Kico pa Spera
Kiermen abo ta considera terapia. Sea bo ta na bo limite of buscanto sosten, terapia por ta un ayudo pa un variedad grandi di keho. Hopi hende a logra haya paz door di bishita un psicologo, maske esey no ta nifica cu na e prome sesion no a sinti ansiedad. Bo por traha un cita pa un sesion gratis di 30 minuut djis pa haci algun pregunta, pero si esey ta sinti manera di mas pa bo mi ta ofrece bo algun mito/creencia falso tocante tratamento psicologico pa duna bo mas informacion.
Mito 1: Mi mester conta tur cos.
Hopi biaha nos tin dificultad pa conta cos na amigo y famia; tin biaha nos no por ni imagina haci esey na un hende straño. Pero bo mester conta bo psicologo tur cos pa e por yuda bo, berdad?
No semper. Bo por conta mi loke bo ta sinti confortabel pa conta mi. Si mi puntra bo algo cu bo ta no sinti confortabel pa contesta, e ora sigur bo por laga mi sa cu bo no kier papia tocante tal cos. Mi no ta husga.
Mito 2: Mi mester haci loke nan bisa mi haci.
Esaki ta un mito problematico den sentido cu hende ta kere cu nan no tin nada di bisa di con nan tratamento ta bay y cu si nan no haci loke e psicologo bisa nan, e ora no tin terapia mas.
E realidad ta cu tur terapia abo ta dirigi. Bo ta bisa mi loke bo kier cambia, drecha of cura di dje y ami ta conseha bo e miho manera pa yega eynan. Hunto nos ta scoge con e tratamento ta cana y mi ta splica exactamente ki tipo di tratamento y ki tecnica ta uza. Si bo no ta gusta e manera con e tratamento ta bay of si bo cambia di opinion, e ora esey no ta un problema. Nos lo ahusta e plan na manera cu e ta miho pa bo.
Mito 3: Mi no mester di un psicologo; mi no ta loco.
Mientras tin psicologo specialisa pa traha cu persona cu malesa mental severo y persistente, masha poco caso ta cuadra cu con media ta pinta esnan cu malesa pisa.
E realidad ta cu mayoria di pashent ta amigo, famia, cu bon trabou, mayor of mucha. Terapia ta bentahoso pa cualkier hende, sea bo tin stress di trabou of di scol, of si bo ta pasando duro den un divorcio of perdida di un ser keri. Nos sa con anda cu problema pisa, pero psicologo por t’ey tambe pa si bo kier djis combersa of alivia bo mes.
Mito 4: Si mi mester di un psicologo of pidi ayudo, mi ta suak.
Hopi biaha nos ta sinti cu nos mester mustra fuerte den tur situacion; pidi ayudo ta mira como seña di debilidad. Banda di esey, hende no tin gana di scucha mi kehonan, berdad?
Echo interesante: un parti grandi di tarea di un psicologo ta literalmente scucha bo kehonan y yuda bo haya solucion pa nan. Hende exitoso ta apto pa enfatisa nan parti fuerte, pero tambe nan ta admiti nan debilidadnan. Ta facil pa bisa cu ningun hende no ta perfecto, p’esey dicon nos ta tene duro na e mesun exigencia irealistico ey? Cos serio ta pasa. Nos ta perde hende cerca di nos, nos ta soporta situacion di stress na trabou y pasa den asunto duro manera divorcio y kiebra di relacion. Hende ta suficiente fuerte pa sobrevivi e susesonan aki, pero tin biaha nos ta lubida con pa biba y disfruta bida. Esaki ta caminda un psicologo por yuda bo para bek riba bo pia.